देखऽ अदमी,फेर भी बड़ा उदास बा

मये संसार दुनिया ,ओकरा  पास बा
देखऽ अदमी,फेर भी बड़ा उदास बा

पानी बा,दूध रोटी बा,बोल रे अदमी
अब तोरा,कवन चीज के पियास बा?

गरीब के लूट के , केहु का ले जाई ?
एगो छिपा बा , आ  दुगो गिलास बा

अरथी के पीछे के भीड़, बता देबेला
के केकर , केतना  एहिजा  खास बा

मानऽ त ,आत्मा में ही परमात्मा बा
ना मानऽ त देह में बस,हाड़ मास बा

कहे के बस,देह में हवा बा,सांस बा
जो रे गुंग,तोरा से बढ़िया त लाश बा

जवना भाषा पऽ,केहु के नाज नईखे
आज ना त काल,ओकर बिनास बा

कमी बेसी, कहंवा नइखे हो मैकश ?
कहीं उनचास बा ,त कहीं पचास बा

#मिथिलेश_मैकश
#छपरा

      #लिखीं_भोजपुरी_पढ़ीं_भोजपुरी
                 #रउवा_बढ़ब_बढ़ी_भोजपुरी